Монгол Улсын Их Хурлын 2016 оны 11 дүгээр сарын 24-ны өдрийн хуралдаанаар батлагдсан “Эдийн засгийг сэргээх хөтөлбөр”-ийн хэрэгжилтийг дэмжих, төсвийн нэгдмэл, тэнцвэртэй байдлыг хангах, сахилга батыг чангатгах, төсвийн алдагдлыг үе шаттай бууруулах замаар өрийн тогтвортой байдлыг бүрдүүлэх зорилгоор Олон Улсын Вальютын Сангийн “Өргөтгөсөн санхүүжилтийн хөтөлбөр”-ийг хэрэгжүүлэх бодлогын арга хэмжээний хүрээнд Монгол Улсын 2017 оны төсвийн тодотголыг боловсруулж 2017/03/24-нд Сангийн сайд Б. Чойжилсүрэн УИХ-ын дарга М. Энхболдод өргөн барьжээ.

Хөтөлбөрийн хүрээнд дараах бодлогын арга хэмжээг хэрэгжүүлэхээр төлөвлөсний дагуу төсвийн тодотголын төсөлд тусгагдсан. Үүнд:

1. Архи, тамхины онцгой албан татвар,
2. Импортын тамхины гаалийн албан татварыг нэмэгдүүлэх;
3. Автобензин, дизелийн түлшний онцгой албан татварыг хуульд заасан хязгаарт багтаан нэмэгдүүлэх;
4. Суудлын автомашины онцгой албан татварыг нэмэгдүүлэх;
5. Хувь хүний орлогын албан татварыг шатлалтай болгох;
6. Хадгаламжийн хүүгийн орлогод татвар ногдуулж эхлэх;
7. Нийгмийн даатгалын сангийн шимтгэлийг нэмэгдүүлэх арга хэмжээг авна гэж заажээ.

Олон улсын худалдаа эрхэлдэг харилцагчиддаа зориулан импортын дээр дурдагдсан нэр төрлийн бараанд ноогдуулахаар төлөвлөсөн гаалийн болон онцгой татварын дэлгэрэнгүйг танилцуулж байна.

1.      Архи, тамхины онцгой албан татвар

Тамхи, согтууруулах ундааны онцгой албан татварыг үе шаттайгаар нэмэх ба

- 2018 оноос10%
- 2019 оноос 5%
-2020 оноос эхлэн 5%-р тус тус нэмэгдүүлэхээр тооцжээ. Хүснэгтээс дэлгэрэнгүй харна уу.

2.      Импортын тамхины гаалийн албан татвар

МУ-н импортын тамхинд 5%-н гаалийн албан татвар ноогдуулдаг ба Дэлхийн худалдааны байгууллагын өмнө хүлээсэн үүргийн дагуу уг хувь хэмжээг 30% хүртэл нэмэгдүүлэх боломжтой байгаа тул 2017 оны 4-р сарын 1-нээс 30%-д хүргэхээр тогтоолын төсөлд тусгасан байна.

Архи, тамхины онцгой албан татвар, импортын тамхины гаалийн татварын хувь хэмжээг нэмэгдүүлснээр төсвийн орлого 2017 онд 20 орчим, 2018 онд 26 орчим, 2019 онд 27 орчим тэрбум төгрөгөөр тус тус нэмэгдэхээр байна. Хүснэгтээс дэлгэрэнгүй харна уу.

3.      Автобензин, дизелийн түлшний онцгой албан татвар

2016 оны сүүлээр Засгийн газар жижиглэн борлуулалтын үнийг тогтворжуулах зорилгоор Засгийн газрын 2016 оны 166 дугаар тогтоол, 2017 оны 34 дүгээр тогтоолоор онцгой албан татварын хэмжээг 2 удаа бууруулсан. Татварын хэмжээг бууруулснаар 2017 оны төсөвт батлагдсан автобензин, дизелийн түлшний онцгой албан татварын орлого 210 гаруй тэрбэм төгрөгөөр буурах нөхцал байдал үүссэн байна. Харин дээр дурдсан 2 удаагийн татварын бууралтыг 2017 оны долдугаар сарын 1, 2017 оны аравдугаар сарын 1-ний өдрөөс эхлэн 2 үе шаттай буцаан нэмэгдүүлснээр төсвийн орлого 2017 оны батлагдсан хэмжээнээс 118,6 тэрбум төгрөгөөр буурах тооцоо гарсан байна.

4.      Суудлын автомашины онцгой албан татвар

4500 см3-аас доош хөдөлгүүрийн багтаамжтай суудлын автомашинд үйлдвэрлэсэн оноос хамааруулж 3-15 хувь буюу 25,000-2,275,000 төгрөгөөр, 4501 см3-аас дээш хөдөлгүүрийн багтаамжтай суудлын автомашинд 40-250 гаруй хувь буюу 4,060,000-47,125,000 төгрөгөөр тус тус татварын хэмжээг нэмэгдүүлэхээр төсвийн тодотголд тусгасан байна. Мөн хос тэжээлт, цахилгаан хөдөлгүүрт болон хийгээр ажилладаг автомашины онцгой албан татварыг 50 хувиар хөнгөлөхөөр хуулийн төсөлд тусгасан бөгөөд эдгээр автомашинд 375,000-6,675,000 төгрөгийн татвар ногдохоор байна. Суудлын автомашины татварыг 2017 оны 4-р сарын 1нээс мөрдөхөөр тусгасан байна. Татварын хувь хэмжээг нэмэгдүүлж, зарим хөнгөлөлтийг бууруулснаар улсын төсвийн орлого 2017 онд 37 орчим, 2018 онд 82 орчим, 2019 онд 98орчим тэрбум төгрөгөөр тус тус нэмэгдэхээр байна.

Эх сурвалж: www.itom.mn